झोळी

पहाडाच्या पायथ्याशी
मैतरीचं रान दाट
अंगओल्या तृणासवे
तुझी माझी गळाभेट

वाट चढणीची होते
तुझ्या गाण्याची लकेर
थेंबाथेंबात भेटतो
पित्यासम तुझा सूर

तुझ्या खटयाळ सरींशी
दवाड वारृयाशी सलगी
धुकाळला घाटमाथा
आभाळाअंगी बिलगी

माथ्यावरच्या राउळी
एक ज्योत फडफडे
तुझ्या पाउलांना घाली
माती मायेचे साकडे

वर शिखर संन्यासी
अवघे अस्तित्व न्याहाळी
दान तुझं उधळून
अक्षयली त्याची झोळी!